საქართველოში ადამიანის უფლებების მდგომარეობის გაუარესებასა და ქართული ოცნების მიერ განსხვავებული აზრის ჩახშობაზე ჰელსინკის კომისიაში 28 იანვარს ბრიფინგი გაიმართება.
ბრიფინგის პრესრელიზში ნათქვამია, რომ დამოუკიდებლობის მოპოვების შემდეგ ქართულმა ოცნებამ ქვეყანა ადამიანის უფლებების ყველაზე მძიმე კრიზისში ჩააგდო.
ინფორმაციაში აღწერილია საქართველოში არსებული ვითარება, რეპრესიები და ნათქვამია, რომ ბრიფინგი მიმოიხილავს ადამიანის უფლებების მხრივ გაუარესებულ მდგომარეობას, ქართული ოცნების ტაქტიკას განსხვავებული აზრის მქონე პირების დასჯისა და დემორალიზაციის მიზნით, ასევე, საქართველოს წინსვლისთვის სამომავლო გზებს.
ბრიფინგი საქართველოს დროით 23:00 საათზე გაიმართება და მისი მომხსენებლები იქნებიან: McLarty Associates-ის მმართველი დირექტორი კლერ კაიზერი, მაკკეინის ინსტიტუტის გლობალური დემოკრატიის პროგრამების დირექტორი ლორა თორნტონი და ჯორჯ მეისონის უნივერსიტეტის მკვლევარი ოლესია ვართანიანი.
"2024 წლის ოქტომბრიდან საქართველოს მმართველმა პარტიამ ქართულმა ოცნებამ საქართველო დამოუკიდებლობის მოპოვების შემდეგ ადამიანის უფლებების ყველაზე მძიმე კრიზისში ჩააგდო. მათ მიიღეს 20-ზე მეტი ახალი კანონი, რომლებიც აფართოებს სახელმწიფოს ძალაუფლებას განსხვავებული აზრის ჩასახშობად და ართმევს სასამართლო სისტემას დამოუკიდებლობას.
რეპრესიებმა მოიცვა სამოქალაქო საზოგადოება, ჟურნალისტები და პოლიტიკური ოპოზიცია. ხელისუფლებამ გაყინა იმ ორგანიზაციების საბანკო ანგარიშები, რომლებიც დემონსტრანტებს სამართლებრივ დახმარებას უწევდნენ, დააკავა ჟურნალისტები და ე.წ. სასამართლო პროცესებზე დაიბარა ოპოზიციის წარმომადგენლები, რომლებიც შემდეგ ამ პროცესების ლეგიტიმაციაზე უარის თქმის გამო დააკავა.
მშვიდობიან პროტესტში მონაწილეობა დღეს მძიმე ჯარიმებსა და ხანგრძლივ პატიმრობას იწვევს. ბრიფინგი მიმოიხილავს ადამიანის უფლებების მხრივ გაუარესებულ მდგომარეობას, ქართული ოცნების ტაქტიკას განსხვავებული აზრის მქონე პირების დასჯისა და დემორალიზაციის მიზნით, ასევე, საქართველოს წინსვლისთვის სამომავლო გზებს"- ნათქვამია განცხადებაში.
დახურვა